Hari Jadi Sampang sè Kapèng 402, Bupati ben Wakil Bupati Sampang a Sareng Sadhejeh Pongghebeh Pamarènta Nyalasè ka Situs Makam Rato Ebhu.
SAMPANG | Seputarhukumindonesia.com – Mènangka begien derih serangkaian acara peringatan Hari Jadi Kabupaten Sampang sè kapèng 402, Pamarènta Kabupatèn Sampang mabedheh acara nyalasè de’ situs Makam Rato Ebhu, Salasa (23/12/2025).
Kegiatan sè berlangsung khidmat ka’dintoh è pimpin langsung kalaben Bupati Sampang, H. Slamet Junaidi, sè è dampingi sareng Wakil Bupati, Jajaran Forkopimda, anggota DPRD Kabupaten Sampang, para tokoh Ulama’, para Kepala OPD, tor masyarakat sekitar èpon.
Nyalasè panèka a deddiyaghinah momèntum rèflèksi ben napak tilas ka’angghuy maènga’ jasa-jasa para bangatowa, tamaso’ Rato Ebhu, sè è yakowèn a ghedhuwen peran sèntral è delem sejarah kemajuan Madhureh, khusus èpon Sampang.
Delem pamator dhebuna, Kanjeng Raden Tumenggung, sebbhudhen gelar bangsawan sè anyar è parengih para Rato dhe’ H. Slamet Junaidi, Bupati Sampang ka’dintoh madepa’ kalaban lugas, manabih nyalasè panèka benni sakadher agenda taonan, namong bedeh makna sejarah sè delem ka’angguy sadhejenah, mènangka proyèksi sè konstruktif kaangguy generasi sè bhekal deteng.
“Acara nyalasè sè è laksana’aghi panèkah tak sakadher formalitas, namong ikhtiar sakabbhinah ka’angghuy a bangun memori kolektif bân ma jheg-jheg èpon kasadaran historis se a dhesarraghi fondasi parjhelenan Kabupaten Sampang se samangkèn ampon napa’ ka 402 taon,” ca’èpon Aba Idi, julughen akrab èpon Bupati Sampang.
Menorot èpon, è situs bersejarah ka’dintoh, sadhejeh unsur masyarakat èonjang ka’angghuy matoron ego, najemmaghi refleksi, bân nèroh nilai-nilai perjuangan bangatowa, sè è toronaghi derih generasi ka generasi.
“Derih Rato Ebhu bân bangatowa laènna, sadhejenah a warisi keberanian, kearifan lokal, ben kamampuan ka’angghuy a bangun tatanan sosial sè a landassaghi derih nilai-nilai agama, kamandirian, ben kamaslahatan,” ca’èpon ngongkappaghi.
Delem Peringatan Hari Jadi sè kapèng 402 taon mangkèn, Kabupatèn Sampang kalaben tèma “Harmoni Berkelanjutan”. Aba Idi lajhu a jellassaghi jhe’ tèma ka’ḍintoh aropa’aghi cerminan jati diri daerah sè ampon è padheddhi molaèn jeman bangatowa.
“Harmoni bhunten ta’ ma’èang parbhida’an, namong ngelola kalaben bijak ka’angghuy tojjuwan sè padeh de’ sakabbhinah. Sementara èpon manabih keberlanjudhen panèka tanggung jawab moral sabherengan ka’angghuy a jegeh bân a rabet warisan nilai ka’dintoh sa’èngghena tetep relevan mongghu dhe’ generasi sè bhekal deteng,” amanat Bupati kalaben jherna.
Saterrossah, Aba Idi ngajeg dhe’ sadhejeh èlemèn masyarakat sopajeh terros ngotama’agi kolaborasi è delem pembangunan daerah, kalaben makowat semangat gotong royong mènangka è kaghebey fondasi peradabhen Sampang.
“Molaèn jeman bangatowa, peradabhen ampon è bangun lèbet komitmen kaparcaje’en, norma kerja sama, ben semangat gotong royong, ben panèkah nilai-nilai sè kodhu terros è rabet,” ca’èpon makènga’
Bupati jughen negghessaghi komitmen Pamarènta Kabupaten Sampang ka’angguy a jegeh kaseimbangan tello’ pilar pembangunan, èngghi ka’dintoh : stabilitas ekonomi, penguatan sosial, sareng kelestarian lingkungan.
“Komitmen panèkah a ropa’aghi bentuk penghormatan sè nyatah de’ warisan bangatowa, ben jhughen mènangka deddhih jaminan jhe’ pembangunan sè è lakonih samangkèn bhekal onggu-onggu berkelanjutan è masa sè bhekal deteng,” dhebunah Aba Idi ngongkap aghi.
Ban è akhir dhebuna, Bupati ngatorragi pangarep, momèntum Hari Jadi Kabupatèn Sampang sè kapèng 402 panèkah bhekal dheddih tolok ukur ka’angguy lebbi makowat sinergi tor optimisme delem a lanjuttaghi pambangunan daèrah.
“Moghe-moghe Kabupaten Sampang salanjengnga è parèngih kakowadhen, persatuan, tor kebijaksanaan delem a jegeh kaharmonisen ben mawujud aghi kamajuen berkelanjutan, a kadhih sè è damba’aghi sareng para bangatowa,” pangarep akhir dherih dhebuna, ben è totop kalaben a dhuweh. (Yan’S)